முதல் காதல்

முதல் முதலாய் பார்த்ததுமே
உலகம் முழுக்க மறந்ததென்ன?
கண்கள் நான்கின் தீண்டலிலே
காதல் குழந்தை பிறந்ததென்ன?

இரண்டாம் முறையாய் பார்த்தபோது 
விரல் கொடுக்க துணிந்ததென்ன?
இது தானோ காதல் என்று
நொடி பொழுதில் புரிந்ததென்ன?

அப்படி என்னதான் பேசுவீர்கள்? - என்று
தோழியை கேலி செய்ததென்ன? -இன்று
காலம் என்பதை மறந்துவிட்டு
காரணம் இல்லாமல் பேசுவதென்ன?

பாறை போல இருந்த இதயம்
சோழி போல சுழல்வதென்ன?
இறகு போல திரிந்த மனது
சிறைக்குள்ளே அடைந்ததென்ன?

முத்தம் என்றால் சத்தம் என்று
இதுவரை நானும் நினைத்ததென்ன?
மூச்சு காற்றின் ஓசை கூட
மெல்லிசையாய் ஒலிப்பதென்ன?

காதல் வந்தால் இப்படித்தானோ
எனக்குள் நானே சிரிப்பதென்ன?
தாலி கட்டும் நேரம் நினைத்தால்
தரிசு நிலமும் விளைவதென்ன?