இந்த காதல்

தவிப்பும் தாகமும்
தணியாது இந்த காதலில்

சண்டையும் சமாதானமும்
சாதாரணம் இந்த காதலில்

குழந்தையும் குமரியும்
குணமொன்றே இந்த காதலில்

கிழவியோ கிள்ளையோ
கிளியோபாட்ரா இந்த காதலில்

இடைவெளியும் இணைதலும்
இல்லாததேது இந்த காதலில்

முத்தமும் முறைப்பும்
முக்கியம் இந்த காதலில்

வெட்கமும் விலகலும்
வேண்டும் இந்த காதலில்

தொடுதலும் தொல்லையும்
தொந்தரவில்லை இந்த காதலில்

அடித்தலும் அணைத்தலும்
அஹிம்சை தான் இந்த காதலில்

ஆச்சாரமும் அபச்சாரமும்
அர்த்தமில்லை இந்த காதலில்

அச்சமும் அடமும்
அழகுதான் இந்த காதலில்

பிரிதலும் புரிதலும்
புதுமையில்லை இந்த காதலில்

பணமும் பரதேசியும்
பேதமில்லை இந்த காதலில்

கொஞ்சலும் கெஞ்சலும்
கொசுறு தான் இந்த காதலில்

கல்யாணமோ கல்லறையோ
காதல் தான் இந்த காதலில்